Lu Granni Allianatu

«Granni Allianatu, ma unni m’ha purtatu?» accussì dissi Cicciu Munnizza quannu mi lu purtai ‘n jornu a fàricci vìdiri unni studiava. «Ma chi è stu cosu? No, no, ju nun cci trasu di intra, mi scantu. Nun cci cridu ca è la tò scola, tu mi stai abbabbiannu» cuntinuau a lamintàrisi.

Canuscìa Cicciu Munnizza di quannu èrimu picciriddi, iddu avìa statu sempri scantulinu, nun s’avìa mancu arrivatu a pigghiari la terza media picchì nun sapìa parrari talianu, avìa statu crisciutu ‘n campagna e babbu ppi comu era avìa addivintatu armali macari iddu e nun sapìa stari cchiù ammenzu a li cristiani. Ju sulu ogni tantu lu facìa sfantasiari.

«Babbignu» cci dissi «siddu nun trasi ccu mia m’affennu!» e lu taliai fissu.
«Allianatu, ppi favureddu, nun ti siddiari! Lu fattu è ca mi pari nu locu strammu, nun mi pari na scola…» dissi Cicciu Munnizza taliannu a firriari tunnu comu li latri.
«Sangu di Giuda!» attaccai a fari vuci pirdennu la pacenza. «Mancu siddu fussi la tana di lu scursuni, siddu voi vèniri ccu mia t’ha stari mutu e nun t’ha lamintari annunca n’àutra vota ti lassu a pàsciri crapi ccu tò ziu, ca si’ cchiù cuntentu ddà!».
Cicciu Munnizza parìu comu li picciriddi quannu vèninu vuciati di lu patri, calau la testa ‘n terra e mi vinni appressu senza parrari, taliànnusi li scarpi comu siddu ‘n terra cc’èrunu ova di canziari. Ma picchì mi l’avìa purtatu a lu Munasteru di li Binidittini? Picchì avìa sprimintatu chiddu ca a la scola m’avìanu anzignatu ca si chiama ossimoro, Cicciu Munnizza e la Facultati di Littri e Filusufìa?

Tutti chiddi ca mi canuscìanu mi chiamàvanu Granni Allianatu, oppuru dicìanu ca ju era foddi e ca nun campava nti lu munnu di li cristiani ma nti chiddu di li sunnatura fora di senziu. Stu fattu succiudìa picchì pinzava ca la Sicilia era na cosa e l’Italia n’àutra, picchì nun vulìa accapari d’addupirari lu sicilianu parrari di lu mè pòpulu e lu vulìa fari lingua littiraria. Picchì ju, parrannu senza affruntu, talianu nun mi cci sintìa. Danti, Pitrarca e Machiavelli, ppi caritati, avìanu statu granni allittirati e òmini di gnegnu, ma ju li sintìa furasteri, mi piacìvanu cchiossai Vinizzianu, Meli e Buttitta ca parràvanu comu a mia e ca nun s’affruntàvanu di puitari nti la lingua di li sò patri, no ccu aria fulclurìstica ma ccu chinu sintimentu di vantu. Eppuru jìa a li scoli unni anzignàvanu la littiratura taliana e no chidda di la mè terra, unni si parrava lu talianu e no la lingua ca ju parrava, unni tutti li genti parràvanu ‘n manera fina e cu parrava sicilianu nun lu capìanu. Dunca ogni tantu, sulu ppi parrari n’anticchiedda nti la mè lingua, mi jìa a ricògghiri di li trazzeri a Cicciu Munnizza e mi lu purtava ccu mia a Catania ppi fallu passiari, fàricci arricurdari comu era lu munnu di li cristiani e fàricci vìdiri macari quarchi fìmmina.

«Allianatu, chi cci haju acchianari macari ju ppi sti scali?», spiau Cicciu turnannu a sùsiri avveri l’aria la testa.
«Ca certu, ti staju purtannu susu, accussì ti fazzu vìdiri na cosa» cci arrispunìi ‘n manera duci, picchì canuscènnulu m’avìa nzignatu ca ccu iddu si cci avìa  a parrari comu si parra a li picciriddi.

La Facultati di Littri e Filusufìa cumparìa a mia comu nu avampostu di lu Riggimi Talianu ca tinìa sutta occhiu li pòpuli di lu Mungibbeddu ppi megghiu culunizzalli. Quannu caminava ppi li granni currituri di lu Munasteru di li Binidittini e taliava li janchi mura e li nfinuti ceddi di li mònachi, ca ora èranu stanzi privati di prufissura, pinzava ca na vota chistu avissi pututu èssiri nu locu chinu di maggìa, mentri ora comu ora parìa n’anticchiedda mortu, comu siddu l’anni l’avìssiru azzittutu, comu siddu quarchi dimoniu cci avissi scippatu l’arma e si l’avissi purtatu ccu iddu, lassànnulu comu nu munzeddu di petri ccu bedda furma ma privu di ciamma vitali. Vidìa studenti cassariati ca caminàvanu lesti lesti di ccà banna e di ddà banna circannu ora na cosa ora n’àutra, prufissura ccu n’aria abbiluta ca jìanu trispitiannu senza prescia e alleggiu alleggiu, genti ca nun avìanu pràttica ccu la grannizza di lu postu, ca si pirdìanu e jìanu a spiari a cu vidìanu prima unni s’attruvava l’àula tali, la bibbliuteca suttirrania o l’auditorium quannu cc’era quarchi parrata d’unu mpurtanti o quarchi làuria. Ma la visioni ca mi pigghiava cchiossai di tutti l’àutri e ca mi lassava cchiù cunfunnutu era chidda di li turisti ccu li càusi curti e la peddi jarna ca vinìanu di l’àutra parti di lu munnu e taliàvanu disiusi a firriari tunnu, tirannu futugrafìi a ogni agnuni e purtusu e jennu appressu a la guida ca cci cuntava nti na lingua strana la storia di lu Munasteru. E macari ju pinzava a la storia: ufficiali, ammucciata, di riggimi. Pinzava ca na vota ccà cc’èranu ppi daveru sti tantu abbanniati Binidittini, ugnunu ccu la sò stanza, ccu li sò prijeri, ccu la sò vita. Munaccheddi tutti mpignati ccu li sò attivitati: lu spertu di cucina, chiddu ca canuscìa l’ervi ppi fari passari li mali, chiddu ca avìa li sò ntrallazzi, la fìmmina, li figghi e lu cumpari a tipu don Blascu di De Robertu, chiddu ca avìa statu furzatu a fàrisi mònacu oppuru chiddu ca l’avìa fattu ppi lagnusìa, chiddu ca jìa sempri studiannu li cosi santi ed era sempri circannu quarchi libbru pirdutu di lu tempu ca lu putìa mèttiri megghiu ‘n cuntattu ccu lu sò Signuri nfinutamenti àutu, ppi fallu acchianari direttamenti di vivu ‘n Paraìsu. E pinzari ca ccà na vota vinìanu mannati li carusiddi di li megghiu famigghi di la Sicilia, figghi di Vicirrè e di Prìncipi, ca cu trasìa ccà addivintava omu di lustru.

Mi firrìu e vidu ca Cicciu Munnizza nun cc’è cchiù. «Babbignu di trazzera,» pinzai «ora unni l’haju a jiri a pigghiari?»
Juncennu nti la zona davanzi lu Coru di Notti vutai l’occhi e attaccai a taliari fora di lu vitru di nu barcuni. «Chi maravigghia!» mi scappau di diri, senza arrinèsciri a trattèniri li palori a lu vìdiri la tanta biddizza di lu Chiostru Granni sutta di mia, e mi passau ppi testa la scrizzioni supra Porta Uzeda «Sapientiae et bonis artibus», ca mi fici pinzari quantu nti lu tempu passatu la Sicilia pinzava a l’arti e quantu anveci lu Statu talianu la cummatti picchì li cuvirnanti pènzanu sulu a fàrisi li liggi ca megghiu aggiùvanu a la sò sacchetta.

Lu barcuni era chiudutu, nun si putìa nèsciri fora. Ma picchì? Forsi lu Statu Talianu nun manna sordi all’Univirsitati ppi pulizziallu, forsi lu ponnu tastari e tuccari sulu li granni cristiani e ju nun penzu d’èssiri unu di chissi, oppuru forsi ha stari chiudutu picchì accussì sulu si pò sarvari l’ùrtima anticchiedda di maggìa di lu locu. «Chi piccatu!» mi niscìu sulu sulu di la vucca. «Chi piccatu!» cuntinuai a diri pinzannu ca lu Munasteru di li Binidittini era unu di li cchiù granni d’Europa e di biddizza nun avìa cchiù picca di li megghiu college di Oxford. Nu Chiostru Granni si lu nsònnanu ‘n tuttu paru lu munnu: sicunnu mia, nuddu cci pò.

Lu mè cori attaccau a chiànciri. Caminai ancora, scurdànnumi di ddu ntamatu di Cicciu, senza pinzari né unni jiva e mancu chi stava cumminannu. Vitti na panca davanzi a mia, una di ddi panchi di lignu chiaru davanzi a li stanzi di li prufissura, panchi ca avìssiru a sèrviri a li carusi ca fannu èsami o vannu a lu ricivimentu ppi stari cueti quannu aspèttanu lu sò turnu. Panchi anveci ca jèttanu sempri troppu picca picchì ponnu tèniri màssimu tri cristiani, mentri ppi l’èsami nun cci sunnu mai cchiù picca di centu carusi. M’assittai nti dda panca, nun cc’era nuddu esami davanzi a dda stanza, nun facìa mpacciu ccu la mè pirsuna. Attaccai di novu a pinzari ‘n manera cchiù gravusa, a maciddiàrimi lu senziu. Passaru na para di minuti e nun m’abbacava, ni fici passari àutri cincu, àutri deci, ‘n quartu d’ura, menz’ura: nenti abbaccamentu, nti la mè testa cc’era na verra ‘n cursu.

Passa nu picciuteddu qualegghié e s’assetta nti la mè stissa panca, vidu ca macari iddu nun è tant’assai abbacatu ma nun cci spìu nenti, è unu di chiddi tutti ppi li fatti sò, mancu ad accuminciari na discussioni ca s’accapa doppu tri palori: iddu è talianu, ju sicilianu, vinemu di dui paisi diversi, si vidi sùbbitu.
Vaju attorna a li mè pinzeri.Tutti cosi nti stu Munasteru mi pàrinu strancanciati, ju nun sacciu comu putìa èssiri prima ma mi pàrinu strancanciati lu stissu. Siddu ju cci avissi pututu èssiri quannu ccà dintra cc’èranu li fazzioni nti l’anni di la Spidizzioni di Garibbardi, ju sicuramenti m’avissi misu nti chidda di li Burboni, ju avissi statu ccu lu Re comu a Cunsarvu Uzeda. Ju avissi sicuramenti jutu nti lu Re a Nàpuli ppi dicirìcci d’asmuvìrisi e di nun pirmèttiri ca lu sò Regnu vinissi accussì cunquistatu senza jitu mòviri. Ma chi vaju dicennu? Quali Re e Vicirré, accuddì nun si putìa cuntinuari, la suvranitati di lu pòpulu è cosa funnamintali, nun si po’ canciari ccu nenti. La megghiu cosa avissi statu èssiri parti di chiddi ca facìanu la Rivota Nnipinnintista di Palermu di lu Jinnaru 1848 contru li stissi Burboni, mali cuvirnanti ca nun avìanu nenti chi vìdiri ccu li Araunisi, ca èranu discinnenti di lu Granni Re Fidiricu funnaturi di la Scola Puètica Siciliana. «Ch’era beddu lu Statu Nnipinnenti di Sicilia!» mi vinni di pinzari, cuvirnatu di Ruggeru Sèttimu, ca durau sulu 18 misi picchì li Burboni jeru a pigghiàrisi arreri la Sicilia. Chissu avissi pututu èssiri lu megghiu futuru ppi la Sicilia, anveci semu ccà, fermi a taliari lu scùrriri di la storia nti stu Munasteru.

Chiudìi l’occhi ‘n minutu e lu munnu mi passi tuttu paru trucculianti, cascai nti la diminziuni di lu sonnu e tutti cosi canciaru.
«Chi stai facennu ccà fermu?» mi dissi lu carusu a lu mè cantu nti nu sicilianu senza affruntu e ju cci arristai. «Ccu tia l’haju, nun ti scantari! Nun lu sai chi jornu è oggi?» si fici prisciusu, vidennu ca ju nun cci arrispunnìa.
«Chi jornu è oggi?» cci vosi spiari babbu babbu senza capiri.
«Babbignu ca si’,» mi dissi e nun si firmau «si vidi ca si’ unu ca s’ha scurdatu li so’ urìggini, ca s’ha fattu culunizzari di lu pinzeru talianu!».
«Ju propriu?» cci dissi sintènnumi comu siddu lu munnu avissi statu vutatu a la riversa. «Ju sugnu nu patriota sicilianu, ju sugnu unu ca cummatti ppi lu ricanuscimentu ufficiali di la lingua siciliana…»
«Dunca a lu casu miu fai» nun mi fici finiri di parrari e agghiuncìu «oggi è lu 17 di Giugnu…nun ti dici nenti stu jornu, sicilianista ca dici d’èssiri?»
«Lu 17 di Giugnu…fammi pinzari nu sicunnu sulu!» priai lu carusu e mi misi li manu nti la frunti comu ppi maciddiàrimi megghiu e lu suduri accuminciau a culàrimi. Comu nu lampìu di na machina futugràfica m’arricurdai chi è ca fussi lu 17 di Giugnu e dissi quasi quasi ccu li làcrimi a l’occhi e na strèusa risata libbiratoria: «Oggi è l’annivirsariu di la Straggi di Murazzu Ruttu. Lu 17 di Giugnu di lu 1945 vinìanu ammazzati nti la strata ppi Rannazzu lu cumannanti Antoniu Canepa e àutri dui mèmmira di l’E.V.I.S., l’Esercito Volontario per l’Indipendenza della Sicilia, lu sulu muvimentu partisanu ‘n Sicilia, chiddu ca amu arringrazziari ppi lu fattu ca lu Statu Talianu n’addutau di lu Statutu Spiciali, lu stissu Statutu ca li nostri puliticanti nun hannu arrispittatu ppi cchiossai di sissant’anni picchì hannu statu assirvuti a li partiti di Roma».
«Minchia!» cci scappau diri a lu carusu, scusannu la palora. «Fratuzzu miu, è cchiossai di chiddu ca m’aspittava di sèntiri. Oggi è lu jornu màggicu ca la Sicilia aspetta di centucinquant’anni. Tutti li nnipinnintisti sunnu ccà a lu Munasteru di li Binidittini, ammenzu a li studenti e a li prufissura di la Facultati cci sunnu cintinara e cintinara di patrioti comu a nuatri e nuddu l’ha mai saputu, tutti pari hannu sempri parratu talianu e fattu li allitturati mentri ccà si cuncentra la cchiù àuta pircintuali di Arraggiati di tutta la Sicilia. Nun fai parti di lu Cìrculu?»

Nun putìa crìdiri a chiddu ca lu carusu mi stava dicennu, lu cori mi subbattìa comu mai prima di tannu avìa succiudutu nti la mè vita: unni avìa campatu nzinu a ddu jornu? Pussibbili ca nun mi n’avìa mai addunatu ca lu Munasteru nun era mortu comu pinzava ma ca era chinu di genti comu a mia e macari cchiù megghiu di mia? Mi stava forsi abbabbiannu stu carusu?

«Chi è stu Cìrculu?» spiai a lu carusu comu pigghiatu di li bummi.
«Comu è pussibbili ca unu accussì sicilianista comu a tia nun sapi chi è lu Cìrculu di l’Arraggiati?» mi vuciau iddu, nun cridennu a li sò aricchi. Ju cci jisai li spaddi ca quasi quasi la gnuranza mi manciava ed iddu attaccau a cuntari.
«Lu Cìrculu di l’Arraggiati è na setta siggreta di nnipinnintisti ca s’ancòntranu nti li nuttati nti lu jardinu di lu Chiostru Granni. Ogni 17 di lu misi, ‘n mimòria di Antoniu Canepa, nun sacciu si cci ha fattu mai lu casu, la Facultati arresta graputa ppi òrdini suprajuri e li nnipinnintisti di tutta para la Sicilia vèninu ppi parrari di li stratiggìi cumuni d’addupirari contra lu Statu Talianu».

Nun appi mancu lu tempu  di pinzari ca lu silenziu sòlitu di la Facultati vinni asmuvutu e na fudda sirvaggia di carusi ccu banneri di lu Vèspiru e di l’E.V.I.S. spuntau di lu currituri facennu vuci.
«S’ha finiri lu Riggimi Talianu!»
«Gloria a la Trinacria!»
«Sicilia contra mafia e mafiusi di li Parramenti di Roma e Palermu!»
«Trinacria nostra sula patria!»

Chi stava succiudennu? Chissu era lu jornu primariu di la mè vita, chiddu ca ogni Sicilianu dignu di stu nomu avissi a disiari di vìdiri? Lu carusiddu a lu cantu miu si misi a fari vuci macari: «Chissi sunnu l’Arraggiati! Ca la Raggia n’acchiniassi a tutti pari ppi la testa! Pòpulu Sicilianu, stùppati l’occhi, chistu è lu Jornu! Oggi l’armi di la nostra millinaria storia di rivoti nnipinnintisti sunnu tutti ccà a lu Munasteru!»
E vitti passari genti ca canuscìa, genti ca parràvanu sempri ‘n talianu ca si sarvàvanu la botta ppi stu jornu, prufissuri, amici, pirsunali di l’Univirsitati, tutti pari Arraggiati, e ju, ca mi facìa cummintu d’èssiri lu sulu patriota di Catania, senza ‘n filu di bannera nti li manu e fora di lu munnu. Picchì ju sulu nun avìa saputu nenti?

«Carusazzi,» dissi unu di la fudda ca passava «chi stati facennu ancora ccà? ANTUDO, lu curaggiu ha èssiri lu sulu vostru patruni! Viniti appressu a nuatri siddu vuliti la libbirtati di la vostra terra!».

N’àutru di la fudda, senza ciatu jittari, mi misi nti li manu na bannera luciusa e mi fici lu salutu sicilianu ccu li tri jita. Nti ddu sicunnu comu siddu lu mè sangu stassi friennu, mi sintìi tuttu addivèniri russu e li mè jammi senza ca ju l’avissi cumannatu attaccaru a caminari appressu a la fudda ca si n’jia avveri l’Àula Magna addidicata a lu granni e lustrusu Santu Mazzarinu, prufissuri di Storia Rumana e auturi di la munumintali òpira Lu pinzeru stòricu clàssicu. La storia a ddu puntu accuminciau a turnari arreri prutagunista, a canciari l’addurmisciutu cursu di li sèculi di la Trinacria e a nèsciri fora di la caggia unni avìa statu tinuta nzinu a ddu jornu.

«Ma picchì stamu jennu a l’Àula Magna?» spiai a na carusa a lu cantu miu ammenzu a la fudda di lu fucusu Pòpulu Sicilianu ca s’arribbillava.
«Cc’è lu discursu di lu novu Mariu Turri, lu cumannanti di l’Arraggiati. L’hannu a trasmèttiri ccu la Radiu Univirsitaria ppi addichiarari la nasciuta di la Nova Ripùbbrica Nnipinnenti di Sicilia. Oggi è lu jornu di la maggìa!» mi dissi la picciuttedda facènnumi vuci a l’aricchia picchì di lu troppu vuciari nun s’arriniscìa a capiri cchiù nenti.

L’aria accuminciava a mancari, mai nti lu Munasteru di li Binidittini avìa vittu na cunfusioni di sta manera, mai avìa ammagginatu di quannu avìa vittu la luci di lu munnu ca ju avissi pututu vìdiri na jurnata di chissa. Pinzava a li fantasìi di quannu era cchiù picciriddu, quannu pinzava comu avissi statu vìdiri la Rivuluzzioni Francisa, chidda Russa d’Uttùviru, oppuru chidda Cubbana, ora anveci na Rivuluzzioni cci l’avìa davanzi a mia e ju avissi statu parti ccu li mè azzioni di lu canciari di la Storia. Nti l’Àula Magna nun si putìa arrivari a tràsiri, a la porta cc’era l’assartu, tutti ca si cassariàvanu, ca ammuttàvanu, li primi nerva stàvanu accuminciannu a fàrisi vìdiri nti li carusi, ma ad un certu puntu n’anzianu cristianu si susìu additta di lu tàvulu unni li prufissura facìanu li lizzioni, pigghiau lu micròfunu e tutti pari foru comu addurmisciuti. Nuddu cchiù parrava, nuddu cchiù facìa vuci, nuddu cchiù ammuttava. Lu silenziu pigghiau a rignari ntra li diversi cintinara e cintinara di genti ca èranu intra e fora l’Àula Magna.

«Ma chissu nun è lu Prèsidi di la Facultati?» spiai alleggiu alleggiu a unu qualegghiè ca era a lu cantu miu.
«Shhh! Nun parrari, iddu è lu novu Mariu Turri, lu patri di la patria. Ha statu iddu ca ppi tutti pari sti anni nun ha fattu mòriri lu nnipinnintìsimu sicilianu, ha statu iddu ca facennu finta di èssiri talianu ha arrinisciutu a fari tràsiri ammucciuni l’arma di la Trinacria a lu Munasteru di li Binidittini, ha statu iddu ca sicritamenti ha urgunizzatu l’Arraggiati e oggi ha fattu scuppiari la Rivuluzzioni. Nun fari casu a lu sò passatu, ha statu sulu na farsa nicissaria ppi arrivari a stu jornu ca iddu aspetta di quannu nascìu, ca ju aspettu macari di quannu capìi ca lu Statu Talianu ni stava jittannu a lu ventu, stava addipirdennu comu pruvulazzu, la nostra storia…» lu carusu si firmau comu azzittutu di na luci cchiù granni di iddu. Lu Prèsidi ca si facìa chiamari Mariu Turri, lu stissu nomu c’addupirava nti l’E.V.I.S. Antonio Canepa, accuminciau a parrari, addumatu comu lu focu di lu Mungibbeddu, e chiddi di la Radiu arriggistràvanu e trasmittìanu ogni anticchiedda di ciatu ca iddu lassava jiri nti l’aria.

«Carusi, studenti, prufissura, fratuzzi, oggi 17 di Giugnu 20?? è nu jornu ca ha arristari nti la storia di la nostra terra e di tuttu paru lu munnu picchì è lu jornu ca la Sicilia arrisvigghiata di lu sò sonnu è pronta ppi susìrisi e parrari. Parrari ppi arrispùnniri a tutti l’uffisi ca ha arricivutu nti lu cursu di la storia, parrari ppi diri ca lu sò Pòpulu è di  novu prontu ppi caminari ccu li sò pedi, ca nun ha cchiù bisognu di nuddu ca l’ha cumannari».
Na nfinitudini di battuti di manu firmau lu discursu di Mariu Turri, li carusi attaccaru di novu a fari vuci e a diri: «Sicilia Nnipinnenti! Sicilia Lìbbira!»
«Fratuzzi, oggi 17 di Giugnu 20?? mi pigghiu li mè rispusabbilitati stòrichi ppi zoccu staju dicennu. Li Siciliani sunnu stanchi di èssiri abbabbiati, li nostri cuvirnanti a la Riggiuni e a lu Parramentu di Roma, assirvuti a li Partiti Taliani, hannu fattu ‘n manera di cuvirnari senza fari vàliri lu nostru Statutu Spiciali e arrubbannu a la nostra terra zoccu cchiossai putìanu senza pigghiàrisi la rispunsabbilitati di lu nostru futuru. Nuatri nun vulemu cchiù l’Autunumìa, la jittamu nti la munnizza picchì nun avemu cchiù chi fàrini, lu Statu Talianu ni la desi ppi fari abbacari li partisani di l’E.V.I.S. e l’àutri forzi pulìtichi sicilianisti prima ancora ca vinìa appruvata la Custituzzioni Ripubbricana di l’Italia nti lu finiri di lu 1947. Nuatri nun semu comu a chiddi ca ppi lu troppu picca curaggiu dìcinu d’èssiri autunumisti picchì si scàntanu a pigghiàrisi rispunsabbilitati stòrichi e si n’appruffìtanu di lu liami di li genti ccu la sò patria sulu p’inchìrisi megghiu la sacchetta, ppi putiri cumannari supra àutri genti di li sò àuti càrrichi e ccu li sò maneri mafiusi amministrari la nostra terra. Oggi, 17 di Giugnu di lu 20??, addichiaru, nti lu rolu ca m’ha statu datu no di lu Statu Talianu ma nti chiddu ca m’ha statu datu di lu Cìrculu Nnipinnintista di l’Arraggiati e di tutti pari l’àutri nnipinnintisti di la Sicilia, chiddu di leader di la Rivuluzzioni, la china Nnipinnenza e la nasciuta di la Nova Ripùbbrica di Sicilia».

Na bizzeffa di battutti di manu, di jisati di banneri, di canzuni ‘n sicilianu, di avvrazzi ntra cristiani ca prima di ddu jornu nun s’avìanu mai vittu, firmau lu discursu di lu Prèsidi, ca avìa l’occhi luciusi di sintimentu e nun si sintìu cchiù di cuntinuari a parrari. A stu puntu pigghiau lu micròfunu un carusu longu longu e siccu siccu, ccu la varba bedda pasciuta e l’ucchiali ca  lu facìanu pàriri nu luntanu parenti di Friedrich Engels, nu paru di jeans a la comegghié e na magghiedda spiddizzata di la stati,  unu c’avìa lu clàssicu cumpariri di studiusu ma ca sicuru avìa a malapena vint’anni quantu a mia. Chissu lu canuscìanu pedi pedi comu Peppi lu Persu, era di Nissa e dìssiru ca era unu di li cchiù carusi cumannanti di l’Arraggiati.
«Lu  Munasteru di li Binidittini, tempiu di la cultura scurdatu di lu Statu Talianu, oggi sedi di li Facultati di Littri e Filusufìa e di Lingui e Littiraturi Straneri, l’addichiaru a nomu di l’Arraggiati e di lu Pòpulu Sicilianu lu novu situ primariu di lu Statu Nnipinnenti di Sicilia. Siciliani di tutti li paisi, li campagni e li curtigghi, accucchiàtivi e viniti ccà a difènniri la libbirtati di la vostra patria!».

Peppi lu Persu pirò sùbbitu si firmau picchì nu cristianu n’anticchiedda tignusu, sicuru nu prufissuri di nun si sapi chi, si cci misi a lu cantu ppi parràricci a l’aricchi. Tutti li genti cugghiuti nti l’Àula Magna attaccaru a fàrisi pinzirusi, a vutàrisi ccà banna e ddà banna e si facìanu sempri cchiù cumminti ca cc’era quarchi cosa ca avìa jutu storta.

Ju, ca caminannu a picca a picca avìa arrinisciutu a mittìrimi quasi a lu centru di l’Àula, na vota anticu locu unni manciàvanu li Binidittini, persi li mè pinzera ppi l’aria ed attaccai a taliari avveri àutu lu dammusu pittatu ccu na scena sacra e a pinzari a quantu àutri voti ju avìa taliatu la stissa scena nti lu mentri di li lizzioni, quannu li discussioni si facìanu cchiù pisantuliddi o quannu li prufissuri si pirdìanu nti discussioni senza senziu oppuru quannu si mittìanu, cosa cuntinua, a fari ricrami a li libbra ca avìanu scrivutu ppi falli accattari a li carusi. Nti la megghiu parti di li casi èranu libbra nùtili, ca nun dicìanu nenti di novu ‘n cunfrontu a l’àutri già ‘n circulazzioni, oppuru libbra supra argumenti spirduti e ca già àutri genti di àutri univirsitati n’avìanu parratu macari megghiu.
Peppi lu Persu, n’anticchiedda russu nti la facci, attaccau di novu a parrari quannu chiddu ca cci avìa dittu ddi dui palori s’arrassau di iddu:
«Haju saputu ca lu Statu Talianu sta mannannu forzi di pulizzìa pp’azzittiri a la nasciuta lu Nostru Dirittu di parrari la lingua ca vulemu e arricanuscemu e la valìa di vuliri èssiri lìbbiri, di nun pajari tassi a nu Statu ca nun è lu nostru, di nun èssiri cuvirnati di li mafiusi ca li Partiti Taliani addòpiranu ppi tinìrini manzi e ppi arrivari a lu putiri a Roma. Diversi cintinara di carrabbineri si stannu accucchiannu davanzi Chiazza Danti e si pripàranu ppi tràsiri ccu la forza nti lu Munasteru, jennu contra la vuluntati di lu Pòpulu Sicilianu d’èssiri nnipinnenti, e pp’attaccari e ncarzirari Mariu Turri e tutti li mèmmira di l’Arraggiati. Àutri fratuzzi hannu già pinzatu di chiùdiri la Trasuta Sicunnaria ca porta nti sta Àula Magna ccu diversi varricati, ppi òrdini di lu cumannanti Turri nun ha statu chiuduta la Trasuta Principali e già na fudda di fratuzzi s’ha misu ddà ppi manifistari ca chista è na Rivuluzzioni di lu Pòpulu e no di quattru terroristi comu già si stannu mittennu a diri li tilijurnali. V’anvitu a jiri a la Trasuta Principali di lu Munasteru e a nun pirmèttiri ca li forzi di lu Statu Talianu tràsinu nti la Nova Ripùbbrica Siciliana. Nun fàtili passari, lu curaggiu è lu vostru sulu patruni!»

Li carusi attaccaru tutti a jisari li banneri a l’aria e a fari vuci cchiù arraggiati di prima, la fudda tutta china di prescia niscìu di l’Àula Magna e accuminciau a caminari, quasi cùrriri a diri la viritati, avveri la Trasuta Principali di lu Munasteru, cantannu «¡El pueblo unido jamás será vencido! ¡El pueblo unido jamás será vencido!» e quannu arrivau davanzi a la Trasuta Principali si misi a vuciari ancora cchiù forti: «¡No Pasarán! ¡No Pasarán!». Ju mi sintìa comu di èssiri parti di na speci di liggenna, di na nova mituluggìa pupulari di la Sicilia, di sprimintàrimi prutagunista nti na fudda di vicenni di nu novu puema mudernu d’Omeru. Li carusi di lu mè gruppu si jeru a jùnciri a chiddi ca già di prima avìanu bluccatu la Trasuta e avìanu arrispunnutu a l’òrdini di la pulizzìa taliana ca dicìa di falli passari ccu nu «Trinacria nostra sula patria!» o  ancora ccu nu cchiossai anfucatu «¡No Pasarán!».

Davanzi a li carusi di la Rivuluzzioni Siciliana di li Binidittini èranu a na dicina di metri cintinara di pulizziotti pronti a carricari la fudda ccu manganeddi e scuti, pussibbili già pronti a sparari a la fudda senza nuddu prubblema, senza affruntu o virgogna ad ammazzari carusiddi ca cummattìanu ppi la libbirtati di la sò patria. A nu pricisu puntu, ammenzu a li vuci di la pulizzìa ca cumannava di fari passari e a la Raggia di li nnipinnintisti, na carusidda niscìu di la fudda ccu na bannera di l’E.V.I.S. nti li manu e jìu avveri li pulizziotti ca accuminciaru a minazzalla di sparari. La carusidda junta a mancu nu metru di la pulizzìa taliana accuminciau a svintulari la bannera davanzi a li facci di li pulizziotti e a diri «Sicilia Nnipinnenti!» e «Servi di lu Statu Talianu, turnati a la Patria Sìcula!». Tutta la fudda di li Rivuluzziunari s’accuminciau ad arraggiari e parteru li «ANimus TUus DOminus!», «Lu Curaggiu è lu Tò Patruni!» e n’àutra vota «¡No Pasarán! ¡No Pasarán!». Unu di li pulizziotti cchiù picca pacinziusu e cchiossai fascista di l’àutri puntau senza pinzàricci cchiossai di na vota la pistola ‘n coddu a lu carusa e sparau. La carusa cascau ‘n terra pirdennu la bannera di li manu ca jìu a finiri a li pedi di li pulizziotti. La fudda mpruvvisamenti si fici silinziusa, li pulizziotti arristaru comu sbalurduti di lu fattu: nun si facìa cchiù vuci, nun si cantava, nun s’amminazzava cchiù nuddu. Di la latata di la falangi di la pulizzìa taliana si sintìu na vuciata: «Assassinu!». Nu pulizziottu si fa largu ammenzu a li sò, nesci fora di la linia di li scuti e va avveri la carusa «Grazzia! Grazzia mia!», si l’avvrazza tutta e attacca a chiànciri ammenzu a la dispirazzioni e a fari vuci: «Assassinu! M’ammazzasti a mè figghia, comu si po’ èssiri senza occhi, comu si po’ ammazzari na carusa accussì senza pinzari! Comu si po’ èssiri accussì armali e senza cori… Idda prutistava pacificamenti ppi la libbirtati di la Sicilia: nun avìa mancu sidici’anni!»

A stu puntu li pulizziotti appujaru tutti li scuti ‘n terra, arrumpèru li linii, nun fìciru cchiù vuci e si mìsiru ccu li facci scantati  a firriari tunnu a lu cullega ca s’avvrazzava a sò figghia rivuluzziunaria ammazzata sutta li sò occhi e parìu ca lu silenziu rignassi ‘n tuttu paru lu Munasteru, ‘n tutta para Catania, ‘n tuttu paru l’Universu. Chiddu ca avìa sparatu scappau comu Caìnu doppu c’avìa ammazzatu Abbeli e si spirdìu ntra li strati di la citati nun sapennu unni ammucciàrisi.
A stu puntu mi sintìi tuccari la facci e m’arrisvigghiai di lu sonnu. Cicciu Munnizza m’avìa vittu addurmisciutu nti la panca e nun avìa pututu canziari di distrùggiri la mè Rivuluzzioni. Mi sintìi addipirdutu, avìa turnatu ad èssiri arreri furasteru nti la mè casa e sta vota ncarziratu nti nu funnutu sintimentu di duluri.

«T’ha fattu na bedda durmuta? Ju avìa addivintatu pazzu ccà intra, menumali ca t’attruvai di novu! Unni jiamu ora?» parrau lu babbu e ju mi susì facennu finta di nun sintillu. Jìi a lu cantu na bacheca unni si mittìanu l’avvisi ed accuminciai a lèggiri li tìtuli di dù fogghi appinnuti ccu lu cori ca mi subbattìa forti: «Festeggiamo i 150 anni dell’Unità d’Italia!», «Mostra Fotografica su Garibaldi: l’eroe dei due mondi». Nenti avìa statu, la storia durmìa ancora. La mè terra era ancora cumannata e Cicciu Munnizza mi cuntinuava a taliari aspittannu na rispunnuta c’addimurava a jùnciri.

Na làcrima mi scinnìu di l’occhi, era megghiu turnari ‘n casa, era megghiu accumpagnari di novu Cicciu a pàsciri crapi e lassari lu munnu fàusu ppi comu era.